Anton Pawlowitsch Tschechow

Dr Anton Pawlowitsch Tschechow [ˈtʃʲɛxəf] Антон Павлович Чехов, * 17. Jänner^jul./29. Jänner^greg. 1860 z Taganrog, Russland; † 2. Juli^jul./15. Juli^greg. 1904 z Baadewiiler im Dütsche Riich) isch e Schriftsteller, Novellist und Dramatiker us Russland gsi. Er isch von ere chläibürgerlige südrussische Familie cho und Arzt vo Bruef gsi, het aber fast nume eerenamtlig as Dokter gschafft. Zwüschen 1880 und 1903 het er im ganze mee as 600 literarischi Wärk gschriibe. Internazional isch dr Tschechow vor allem as Dramatiker dur sini Theaterstück wie Drei Schwestern, Die Möwe oder Der Kirschgarten bekannt. Er het Aspäkt us em Lääbe und dr Dänkwiis vo de Lüt in dr russische Browinz wärtnöitral und zrugghaltend beschriibe, und gältet as äine vo de bedütendste Autore in dr russische Litratuur.